នៅក្នុងសន្និសីទសកលមួយនិយាយពីស្ត្រីនិងភាពជាសហគ្រិនធ្វើឡើងកាលពីថ្ងៃពុធកន្លងទៅ ស្ថាបនិកនិងជាប្រធាននាយកប្រតិបត្តិរបស់ក្រុមហ៊ុនលក់ទំនិញអនឡាញ Alibaba លោក Jack Ma បាននិយាយថា ភាពជោគជ័យរបស់ក្រុមហ៊ុនលោកគឺដោយសារតែមនុស្សស្រី។
លោកបាននិយាយថា មូលហេតុសំខាន់ដែល Alibaba ទទួលបានជោគជ័យដល់សព្វថ្ងៃនេះ គឺដោយសារស្ត្រីព្រោះថា ស្ត្រីគឺជាកម្លាំងដ៏សំខាន់ដែលធ្វើឲ្យអាជីវកម្មមានដំណើរការទៅមុខដោយលោកចង់មានន័យថា ដើម្បីឈ្នះយុទ្ធសាស្ត្រទីផ្សារបានលុះត្រាណាតែឈ្នះចិត្តស្ត្រីជាមុនសិន។
លោកបានបន្ថែមទៀតថា៖ “អតិថិជនចម្បងរបស់ក្រុមហ៊ុន Alibaba គឺស្ត្រី ដូច្នេះហើយទើបយើងរៀបចំវេទិកានេះឡើងដើម្បីថ្លែងអំណរគុណដល់ពួកគេ”។ តាមស្ថិតិបង្ហាញថាអតិថិជនជាស្ត្រីបានកើនឡើងលើស៥០ភាគរយនៃអតិថិជនសរុប ហើយពួកគេគោរពកិច្ចសន្យាទិញជាងបុរស។ មិនត្រឹមតែប៉ុណ្ណោះនៅក្នុងក្រុមហ៊ុនរបស់លោកមានប្រហែលជា៤៩ភាគរយគឺមនុស្សស្រី ហើយក្នុងចំណោមនោះមាន៣៤ភាគរយមានតួនាទីខ្ពស់ រួមមាននាយិកាប្រតិបត្តិ, ប្រធានគ្រប់គ្រងជាន់ខ្ពស់ និងប្រធានផ្នែកហិរញ្ញវត្ថុជាដើម។
ក្នុងឱកាសនោះដែរលោក Ma ក៏បាននិយាយដោយលើកតម្កើងស្ត្រីដោយថា៖ “បុរសខ្លាំងគឺត្រូវតែឲ្យតម្លៃស្ត្រី គោរពស្រលាញ់ពួកគេ” ។
ក្នុងព្រឹត្តិការណ៍ចំនួនពីរថ្ងៃដែលធ្វើនៅក្នុងទីក្រុងហានចូវ ប្រទេសចិននោះដែរ គឺផ្ដោតលើភាពជាសហគ្រិនរបស់ស្ត្រីក្នុងសម័យបច្ចេកវិទ្យា ហើយក៏ធ្វើឲ្យមានការទាក់ទាញអ្នកគ្រប់គ្រងជាស្ត្រីល្បីៗ ៨០០ នាក់ជុំវិញពិភពលោក។
លោក Ma ជឿថា អ៊ីនធឺណិតនឹងផ្ដល់ឱកាសដល់ស្ត្រីច្រើនក្នុងអាជីវកម្មរបស់ពួកគេប្រសិនបើពួកគេមានមានបំណងសម្រេចក្ដីស្រមៃនិងចក្ខុវិស័យលើពាណិជ្ជកម្មទាំងនោះ៕
